الخميس، 29 يناير، 2009

نوير...



ارق واحلى وانعم ورده بالدنيا...


من اشوفها لو شنو كان مودي احس بالتفاؤل...


حدي احبها ...


واستانس وايد لما اشوفها ...


صج عجيبه هالورده...


هالصوره صورتها وانا راده البيت.. سفطت بنص الشارع وصورتها.. شكلي كان تحفففه


للاسف...مااتوقع بيطلع نوير يم بيتنا بعد صبخه البنيان




اتمنى لكم نهايه اسبوع سعيده وكلها تفاؤل ومحبه
ودمتم سالمين




الأربعاء، 28 يناير، 2009

كابات علم الكويت...





رحت ذيك المره سوق بو 100 ولا القى هالكبابيس حدها تشوق
واحد جنه قنفذ والثاني جنه تنين

شريت 2 حق خواتي الصغار


ولازم الفوم معاهم .. وقررنا انهم بيكونون من استعدادات الاحتفال بالعيد الوطني وعيد التحرير






بس اللي ما حسبنا حسابه


اخـــــوي

قرر انه ماكو مسيره هالسنه لانهم يننوه العام
وانا ماحب الزحمه فاكيد مرح افتر فيهم

فرح يصير احتفالنا بيتوتي جدام التلفزيون

باي ذا واي .. وادري اني داشه عرض

هالحلو ينن ويصلح للرجيم بعد .. احلى 300 كالوري اقرر اكلها ههههه

الثلاثاء، 27 يناير، 2009

عطري المفضل اليديد...




عادة بالشتا ما استخدم الا العطور العربية او الطيب والبخور...
نادر ما اشتري غيرهم...
وحتى بالصيف لما استخدم العطور الفرنسيه او غيرها.. دايم ادور الشي الخفيف وذوقي تقريبا ثابت
غوتشي
ديور .. فريت على اغلب عطورهم
عطر كاريتا بس هالحجي من زمان لما كان موجود بالكويت
كوكو مامدوزيل ما كنت استخدم الا عطر الشعر وبس يعني ما كنت افكر ادور غيرهم
بس لما شميت كلوي... ماقدرت اقاومها
امبييه عجيييب عجييييب
صج صج دش وعشعش بمزاجي وخلاني اغير عادتي القديمه
واخليه متربع على عرش عطوري المفضله الشتويه بالاضافه الى مجموعه جنيد

الجمعة، 23 يناير، 2009

بس خلاص ... لا للعزايم...


ليش بس ليييييش لما اسوي رجيم وانزل لو حتى 100 غرام... تهل العزايم من كل صوب وطبعا ما يحتاج اوصف التفنن بالاطباق

وتكثر الهدايا والعطايا المسمنه






بالفتره اللي طافت نزلت 5 كيلوات

شحلوي وشزيني

اليوم رديت منهم 3 كيلوات

هذا نموذج من الاسبوع اللي طاف






ككاو من بلجيكا...ثانكس لولي






خاله ابوي الله يطول بعمرها متنقصه قيمه لحم عجييييبه








منمن صديقتي عزمتني على برايم اند توست على بوب كون شريمب وموتزريلا وتين وسلطه وبرجر.. بس الصج الصج جوسي ويهبلللل



بذمتكم شنو تسوون


بس وقفت وقفه جاده مع نفسي وانا ونفسي قررنا


ماكو عزايم


ماكو تخربط

ماكو هدايا مغرضه

وبنشوف يا انا يال "50 "

wish me good luck

الخميس، 15 يناير، 2009

من خيرات الشتويه...







بالنسبه لي الفقع جواهر.. احبه واحب اكله بس ماكنت اعرف انظفه..
ابوي فديت قلبه ياب لي 10 كيلو وانا مريضه...
بعد ما صحصحت سويت لي سيرج يمكن ساعه على طريقه تنظيفه ماخليت موقع ما قريته...
شمرت عن ذراعي وناديت خدامتنا وبلشت بالتطبيق...
كنت حزتها ابي مجبوس لحم وفقع...
صورت بس صحني...
بسم الله :>

الاثنين، 12 يناير، 2009

AaTsHOoOoO


ما اشوف شر .. وديرو بالكم على روحكم...

مادري ليش مناعتي صايره ضعيفه هالايام؟؟؟ مع ان اول كل اللي بالبيت يستمرض وانا الوحيده الصاحيه...

الحمدالله على كل حال

عذروني تاخرت على تعليقاتكم بس اوعدكم اول ما انتصر على هالفيروس المليغ برد عليكم كلكم :>





في امان الله

السبت، 3 يناير، 2009

بالامس كانوا معي واليوم قد رحلوا.. اجمل ما رثي به الامام الحسين عليه السلام...





أفاطم لو خلت الحسين مجدلا* وقد مات عطشانا بشط فرات

إذا للطمت الخد فاطم عنده* وأجريت دمع العين في الوجنات

أفاطم قومي يا ابنة الخير واندبي* نجوم سماوات بأرض فلات

قبور بكوفان واخرى بطيبة* واخرى بفخ نالها صلواتي

واخرى بأرض الجوزجان محلها* وقبر ببا خمرى لدى الغربات

وقبر ببغداد لنفس زكية* تضمنها الرحمن في الغرفات

وقبر بطوس يا لها من مصيبة* ألحت على الاحشاء بالزفرات

إلى الحشر حتى يبعث الله قائما* يفرج عنا الغم والكربات

علي بن موسى أرشد الله أمره* وصلى عليه أفضل الصلوات

فأما الممضات التي لست بالغا* مبالغها منى بكنه صفات

قبور ببطن النهر من جنب كربلا* معرسهم منها بشط فرات

توفوا عطاشا بالفرات فليتني* توفيت فيهم قبل حين وفاتي

إلى الله أشكو لوعة عند ذكرهم* سقتني بكأس الثكل والفظعات

أخاف بأن ازدارهم فتشوقني* مصارعهم بالجزع فالنخلات

تغشاهم ريب المنون فما ترى* لهم عقرة مغشية الحجرات

خلا أن منهم بالمدينة عصبة* مدينين أنضاء من اللزبات
*
*
*
عظم الله اجورنا واجوركم في مصاب ابا عبدالله الحسين عليه السلام
=قصيده دعبل بن علي الخزاعي في رثاء الامام الحسين عليه السلام