الخميس، 25 يونيو، 2009

يوميات نيو مام... الاسبوع الاول

هالبوست نسائي بحت....بتنازل بهالاربعين يوم وبسلف يومياتي حق اختي ههههه
وايد ناس يتساؤلون عن برنامج النفاس والحياه مع النيو بيبي.. اقولكم لا تخافون
انا بكتب من منطلق وضعنا
امي متوفيه الله يرحمها وهذا تقريبا اول حفيد يتنفس عندنا وخاصه ان ما عندنا خبره بهالموضوع كلش ملش ... كنا شايلين هم هالموضوع ونحاتي وما خلينا موضوع بالانترنت او وحده عندها عيال ما سالناها عن نصايح ومشورات :>
عمتي حبيبه قلبي ما قصرت يت عندنا وهدت حفيدتها الاولى ( عمرها شهرين ) عشان تجابل اختي بالاربعين.. وما قصرت علمتنا اشياء وايد ووضحت لنا العلم من الاساطير هههه... اكتشفنا ان الوضع سهل ممتنع بس طلع اسهل من اللي كان براسنا :>
عمتي وخالتي ( خاله ابوي ) وام مرت اخوي .. كلهم ما قصرو معانا وخاصه عمتي
بالنهايه الله سبحانه وتعالى ما يقصر والحمدالله رب العالمين
حبيت اشاركم تجربتنا بالربع الاول من برنامج النفاس بالحساوي ستايل لوووول

الربع الاول ببرنامج الماما
******************
طبعا اول 10 ايام مهم جدا انها تكون مغطيه راسها وريولها والمكان اللي تقعد فيه يكون دافي... الترديد يكون خلال 3 ايام 6 و 7 و8 والهدف منه تخلص من الماي المتجمع بالجسم ورد الرحم الى مكانه الطبيعي ... اختي يابت ام جاسم القلاف وارتاحت منها
ويوم التاسع تغسل راسها عشان تبتدي تصلي...
بالنسبه للاكل بحط لكم صور اكلات تاكلها بهالفتره ( سوتها عمتي او تيينا من الاهل والجيران والحبايب ) وشنو فايدتها طبعا الريوق ثابت يا عصيد يا خبيص ( بثيث ) او حسو مع الادويات
وقبلها على الريج لازم تبلع اللهوم ونفس الشي قبل النوم


الغدا والعشا غالبه طبق رئيسي مع شوربه وسلطه عشان الالياف والفيتامينات

برنامج النفاس تقدرون تاخذونه من اي مكان .. احنا شريناه من ام خالد الهاجري.. الحسو تقدرون تاخذونه من اي حواي وانا انصحكم بحواي القادسيه او الفيحا او من مطاحن سمراء عدن
الحسو...
العصيده...
الخبيصه او البثيث...

هذي مادري اذا احد ياكلها غيرنا اسمها قريصات ... عباره عن عجينه طحين وتمر وحسو تنقلي وترش بسكر بودر

مرقوقه...توكل غالبا كعشا

هذي شخصيا ماحبها مروق ادام دسم مع خضار ...وتوكل اول يومين عشان الوهن اللي تحس فيه الحامل

قبوط...عشان يثقل الرحم

فوح ادام مع رشاد ومادري شنو...عشان تنظف الرحم وتوكل بين الوجبات

خثرة... مغذيه عشان السمج والخضار وبنفس الوقت خفيفه على المعده

فريكه... مدره للحليب

عيش وحلبه ... توكل اما مع لحم او دياي ويوم التاسع او العاشر تطبخ مع ديايه محشيه بصل وبيض واعشاب

الأربعاء، 17 يونيو، 2009

صرت خاله...

بعد 12 ساعه تقريبا بالمستشفى
وبعد معرفه كل مسميات والمسكنات اللي تستخدم بالولاده
وبعد ما طلعت اعصابي على ستاف النيرس ودكاتره التخدير برويال حياه



وصل احلى بيبي بالسلامه وخلاني نيو خاله

والحمدالله رب العالمين

سبحان الله شلون انسان ضئيل واحمر وبس يبجي يقدر يأسر قلبي بهالسرعه ويخليني اتعلق فيه


الله يحفظ لكم عيالكم واحبابكم

ودمتم سالمين

الأحد، 14 يونيو، 2009

busy


تييكم حاله تحسون ان ال24 ساعه مو كافيه؟؟

ان جدول المشاوير يطول ويطول واللي ينشطب منه شي ما يذكر

اتمنى حاليا عصاه سحريه ترجعني 48 ساعه لي ورا عشان اخفف المتكود فوق راسي

دوام لويه
وبالبيت لويه اكثر
وبنت الديره اللي بداخلي لويتها اكبر منهم

الله يسهل ان شاء الله واتركم بحفظ الله ورعايته

ملاحظه : انا اكتب هالبوست وبيدي تقرير لازم اخلصه وزميلي قاعد يحن علي من ورا البارتشن علشان اصيغ له كتاب اعتذار عن دوره ولازم ادق على البيت اتطمن على شغله وصلت ولا لء