الأحد، 28 ديسمبر، 2008

وكل عام وانتو بخير....







يعلها سنه افراح وخير عليكم كلكم ولجميع المسلمين ...وان شاء الله تحقق فيها كل احلامكم وامانيكم











الثلاثاء، 23 ديسمبر، 2008

اموت واعرف شلووووون؟؟؟؟؟


MY MOOD ... (( تحديث ))


في البدايه احب اشكركم كلكم ... مشكووورين وما قصرتو والله


بذيك الفتره كنت مليغه وام دميعه لدرجه اذا ابوي دق علي بالدوام يقولي شفيج اموت من البجي...ونفس الشي بالطلعه مالي خلق اروح مكان لو منو ما يترجاني .. قلت حق روحي لازم اكتشف شنو فيني عشان اعرف اعالج روحي... بعد ما سويت سيرج على بعض الاعراض اللي كنت احس فيها وصلت لي

الاضطرابات العاطفية الموسمية

(SAD) (Seasonal affective disorder) هي نوع من الكآبة الذي يلي تتابع الفصول. ومن أكثر
أنواعه شيوعاً كآبة الشتاء. وتبدأ عادة في أواخر الخريف، وأوائل الشتاء، بينما
تختفي بحلول الصيف. أما النوع الأقل شيوعاً فيعرف بالكآبة الصيفية، ويبدأ عادة في
أواخر الربيع أو أوائل الصيف. ويختفي بحلول الشتاء.


الأسباب
يعتقد
بأن سببه يرتبط بالتغييرات في كمية ضوء الشمس في الأوقات المختلفة من السنة وقد
تؤثر على نصف مليون شخص كل شتاء بين سبتمبر وأبريل وبشكل خاص أثناء ديسمبر وياناير
وفبراير.

الأنتشار
تعاني
النساء أكثر من الرجال من الاضطرابات العاطفية الموسمية. مع نسبة ضئيلة من الأطفال
والمراهقين، وغالباً لا يصاب الأشخاص الأقل من 20 سنة بالاضطرابات العاطفية
الموسمية. أما بالنسبة للبالغين، فيتناقص احتمال الإصابة بالاضطرابات العاطفية
الموسمية كلما تقدموا في السن. وتعتبر الاضطرابات العاطفية الموسمية أكثر شيوعاً في
المناطق الشمالية.

الأعراض

الكآبة
الشتوية
تتضمن الأعراض الشائعة للكآبة الشتائية التالي:
- تغير في الشهية،
خصوصاً اشتهاء الأطعمةَ الحلوة أو النشوية.
- زيادة الوزن.
- الشعور بثقل
في الذراعان أو الساقان.
- هبوط في مستوى الطاقة.
- الشعور بالإعياء.
-
ميل للإطالة في النوم.
- صعوبة التركيز.
- الميل للطيش.
- زيادة
الحساسية للرفض الاجتماعي.
- تجنب الحفلات والاجتماعات الاجتماعية.

الكآبة
الصيفية
تتضمن أعراض الكآبة الصيفية، ضعف الشهية، ونقص الوزن، والأرق. كما تشمل
بعض أعراض الاضطرابات العاطفية الموسمية أعراض أخرى للكآبة. تتضمن هذه الأعراض
مشاعر الذنب, وفقدان الاهتمام بالنشاطات التي كنت تتمتع بها، والشعور المستمر
باليأس، ومشاكل جسدية، مثل الصداع. وتستمر هذه الأعراض بالعودة سنة بعد سنة، في ذات
الوقت كل سنة. ولا ترتبط التغييرات بالمزاج بالضرورة بحالة من الكآبة، (مثلاً
الشعور بالضيق إذا كان عاطلاً عن العمل أثناء فصل الشتاء).
المصدر :
من ويكيبيديا

وديرو بالكم على نفسياتكم... طللع حتى كميه الشمس والجو لها تاثير عليها

من عذر امهات اول الفو قرص عقيلي وبيض القطا والكستنه المشويه وسوالف البرد :q... عاد تصدقون استحيت اقول حق احد ضايق خلقي من البراد.. والنفسيه تعدلت اتوماتيكي من الفشله ... وان شاء الله كلكم نفسيتاكم وحلوة وايجابيه و فوق النخل ولا تتاثرون بتغير الطقس

الجمعة، 12 ديسمبر، 2008

عوار قلب...




اسم الله عليكم من عوار القلب

بهالبوست انا اتكلم عن عصير الضاحيه المسمى " بعوار قلب "

كل من يتكلم عنه ...

وكل من يتشفق فيه ...

قلت بروح اشرب شي ما لاعين رأت ولا اذن سمعت ولا خطر على قلب بشر

شلت شلايلي ورحت الضاحيه ...

طبعا قبل لاروح سويت استفتاء عن اشهر واحلى انواع عصيرهم... والاحتمالات وصلت لي عوار قلب و بوعزوز

اتفقت مع ابوي ان ناخذ واحد من كل نوع ونتبادل ونشوف ...

بعد زحمه تقريبا ساعة الا ربع ...

وشبه انهيا ر عصبي من اللوية والازعاج ...

وصلو المحتفى فيهم ...

والطعم
.


.


.


.


الحمدالله والشكر النعمه ما تنعاب

بس الصراحه رفعوو لي السما واللي ذقته شي جدا جدا عادي.. وهذا اول وتالي ذوق

ودمتم سالمين

الجمعة، 5 ديسمبر، 2008

عيدكم مبارك... وكل عام وانتو بخير..





بمناسبة هالايام المباركه احب اهنيكم بعيد الاضحى وكل عام وانتو بخير
عيد الاضحى احسه عيد مسكين ومهضوم حقه...
محد يحس فيه والعيادي فيه منشفه... لووول
مع ان هالايام اصلا احس ان ماكو احساس بالاعياد سواء الدينية او الوطنيه... صارت مثل الهم وكل من يبي يسافر عشان يفتك من البدله والعيادي..
وجنه العيد بس هق هالسوالف...
حتى اللمه اللي كانت تميز بهالايام احسها مفقوده...
من الاشياء اللي تضحك ان دايما يقولون لنا.. ان عيد الاضحى عيد الحجاج واهم اللي يحسون فيه...
وقبل جم سنه الله اكرمنا وادينا فريضه الحج ( الحمدالله).. كنا بيوم العيد تعبانين وشكلنا مو شكل ناس معيده.. يدتي علقت وقالت.. هالعيد مو احنا اللي نحس فيه ...
مسكين هالعيد...
بس هذا ما يمنع اني اتمنى لكم عيد سعيد... واتمنى من الله قبول اعمالكم وصالح دعاءكم
وكل عام وانتم بخير


الأربعاء، 3 ديسمبر، 2008

انا وابوي...


هالمره بتكلم عن ابوي....


كان يشتغل بالقطاع الخاص... المكان اللي ينقال انه يقدر الشباب وطموحهم


ابوي الله يطولي بعمره كان موظف مثالي...


طول الفتره اللي كان فيها مجموع مرضياته ما تتعدا 7... ( انا بهالسنه بروحها ماخذه 14 مرضيه لووول )


كان يداوم مبجر من اول الناس وما يطلع الا بعد ما يخلص شغله حتى لو بعد ما يخلص الدوام بساعات...


عمره ما تاخر... وماذكر مره انه استاذن وماعنده شغل...


رصيد اجازاته تترحل وتنلغي والسبب انه ما ياخذهم كلهم...


وعمره ما نخصم منه عشان خطأ مقصود او غير مقصود...


ووايد يخاف ربه بشغله...


حتى المخصصات اللي يعطونه له بالشركه... اذا ما يبيها ما ياخذها...


وعلى الرغم من هذا


حاربوه... يابو ناس كانو ترينر عنده وحطوهم فوقه... ما قدروه الا بعد ويييين.. يعني بكل بساطه ما عرفو قيمته


بعد ما طقت جبده منهم تقاعد ( طبعا مو بس هذا السبب حزتها )



انا النقيض...


دوامي 8 .. ساعات اقعد 8 وربع...يعني دايما متاخره


ما اطوف شي من حقي...


استاذن عشان ارد البيت ...


اول شي اطيره رصيد العرضي...


والمرضيات عد وخربط....


الشي الوحيد اللي ملتزمه فيه... اني اشتغل... عمري ما رديت شغل مو عشان شي بس لاني ابي احلل معاشي


مع ملاحظه اني اشتغل بالحكومه .. وهالوضع طبيعي مع الكل مو بس معاي


انا دايما ادش معاه بنقاش حول هالموضوع


من يشوفني راده البيت مبجر يتنرفز .. ويحثني على الالتزام... ويضرب لي امثال وقصص ان الانسان لازم يلتزم وهو يشتغل عشان الله يبارك له في رزقه واذا راددته ان كلهم يسوون جذي يقولي مالج شغل يابنيه انتي سوي المفروض يصير
وساعات يدق علي يلقاني يا اسولف بالمسنجر ولا اسمع اغاني...
ودايما كلمته " انتي ما عندج شغل "


في البدايه ما كان عاجبني كلش اني بالحكومه... احباط وظيفي
ماكو شغل...
الواسطه ماشيه..
حسيت اني وصلت لي مرحله تبلد الاحساس...
وكل بذره طموح فيني ماتت...
لدرجه انه باول اسبوع نزلت الشئون الاداريه وسالتهم متى اتقاعد؟


طبعا انا وعدته الشهر اللي طاف اني التزم واصير مثل ما اهو يبي...
وان شاء الله خير

بس للحين مو قادره اتاقلم مع شخصيه الموظفه المثاليه... تتوقعون السبب من المكان؟؟ ولا لان صج ما عندي شغل؟؟؟

الثلاثاء، 2 ديسمبر، 2008

ريجيمي المفروض امشي عليه من عياده التغذيه ...



كنت افتره اراجع عند عبدالله المطوع بعيادة العوضي...

وغيرت الحين وصار لي فتره اراجع بعياده التغذيه بالصباح...



حطو لي خوش ريجيم...

1300 سعر حراري... موزعه على 5 وجبات بنظام الحصص الغذائيه... هني خوش

بس الموخوش.. التطبيق :(...

يبت لكم نسخه منه مع شويه طمس للحقائق ههههه... ادري الخط مو واضح عشان جذي برد اكتبها



* الريوق :

1/2 ك حليب او عصير



حبه جبن او ملعقتين لبنه



1/2 خبزه او 2 توست



خيار وطماط وخس بكمية مفتوحه




* السناك الاول :

4 حبات تمر او



فاكهه...(رح ارفق لكم جدول بنهايه الموضوع عن الحصص الفواكه ) او



1/2 ك عصير






* الغدا :

سلطه خضراء + ملعقه زيت زيتون



خضراوات سوتيه ( اي نوع تحبونه )



1 ك عيش او 1/2 خبزه ... نصيحه جربو العيش الاسمر لانه يشبع بسرعه



سمك او لحم او ربيان بحجم كف اليد



1/2 كوب لبن + 3 حبات تمر .. هذا اكثر شي عجبني لاني ماعيش من غير تمر






* السناك الثاني :

فاكهه او روب فواكه صغير






* العشا :

(واحد من هالخيارات)



  • نفس الريوق



  • روب +حبه توست + حبه فاكهه



  • 1/2 ك عصير + همبورجر مشوي مع الاضافات



بهالريجيم اكو ملاحظتين:


انه السكر طول اليوم ما يتعدا ملعقتين


ان الماي من 6- 8 اكواب يوميا


ان لازم معاه رياضه .. وانا مطنشه في هالشي




بالمناسبه... خبير التغذيه اللي اراجع عنده ( مبارك العازمي ) وهو وايد خلوق ومحترم.. وهو الحين بالحج

ان شاء الله حج مبرور .. وذنب مغفور... وعودا حميدا له ولكل حجاج بيت الله الحرام



والله يكتب لنا ولكم حج السنه اليايه

امييييييين




الاثنين، 1 ديسمبر، 2008

5 دقايق بقناه الكويت الفضائيه...



انا ماشوف تلفزيون وايد...




جذي ماحبه...




واذا شفت غالبا احوس صوب قنوات شو تايم...




ذيك المره قلت يا بنيه مسكي الريموت وشوفي القنوات من البدايه..


حطيته على الكويت ولا اشوف وحده مبطله حلجه وابره ودم وبلاوي... شالسالفه ولا الموضوع عن تكبير الشفايف...


والله خوش... طبعا انا نو كومنت.. بس بعرف شغله شنو الهدف من هالموضوع؟


اذا دعايه... ماعتقد احد بعد ما شاف اللي شفته بيروح يركض يكبر


واذا تشجيع على هالموضوع... ماعتقد ان تلفزيون الكويت على اخر عمره صار كتالوج اعلاني


وبعدين احس حرام البنت لعبو فيها وعليه.. صارت شفايفها جنها طابوقه




طبعا انا طاقتني البوهه.. شوي ولا تيي الثانيه تسال عن ابر النظاره وهم نفس الشي ابر ومادري شنو بالبرنامج... طبعا انا اخترت صوره مقبوله بس الصور الثانيه كلش مو شي




قلت ميخالف حل اشوف شسالفه هالبرنامج




الفقره اللي بعدها داشه صالون بدي كير مني كير والشريط حق الفلبينيه وهي تفرك ريلها




من صجهم هذيله!!!




دار ببالي هالسؤال مره ثانيه... شنو الهدف من هالبرنامج؟؟؟ دعايه حق الشركه ولا نشوف ريول البنية وشفايفها قبل و بعد؟؟




اللي استشفينه ان الحلقه كانت اخر حلقه.. قلت بقلبي الحمدالله




ليش تلفزيون الكويت صار جذي؟؟؟ وعلى قوله اختي الصغيره موووو صج

الخميس، 27 نوفمبر، 2008

دعاء ...

اللهم إني أسألك باسمك الطاهر الطيب المبارك الأحب إليك الذي إذا دعيت به أجبت وإذا سئلت به أعطيت وإذا استرحمت به رحمت وإذا استفرجت به فرجت .اللهم إني أدعوك الله وأدعوك الرحمن وأدعوك البر الرحيم ، وأدعوك
بأسمائك الحسنى كلها ماعلمت منها وما لم أعلم أن تغفر لي وترحمني

الأربعاء، 26 نوفمبر، 2008

قصتي مع الكاميرا...



يوم شريت سيارتي ...




عطوني كاميرا canon powershot a470




يوم عاد شفت قيمتها بالغانم يمكن 30 ...الله يهداهم الساير شاريه منهم ب 13000 معطيني هديه ام 30 ما علينا...




ولانها من بوبلاش فمستانسه عليها امشي و اجكجك...




عاد كنت احوس بفلكر واشوف اللقطات التصوير من مشاركين لهم نفس كاميرتي...




والصور ما شاء الله حلوة...




وقلت بتعلم ... فكنت احوس بالاعدادات عشان اضبطها على اعداداتهم واصور ...




ابوي المسيجين كان يمي... وكانت اولى تجاربي اصور ايده وهو يشوف تلفزيون...




شرايكم تتوقعون في مني امل ؟


الثلاثاء، 25 نوفمبر، 2008

فضفضة...


امس صارت لي مفاجاه واااايد حلوة على نهاية الدوام وعلى قولتهم


it made my day ...


وكنت حاسه ان ماكو شي بالدنيا ممكن يخرب سعادتي ..


اليوم الصبح وانا اكلم وحده من اعز صديقاتي المود حده سوا U وصار بالعكس


تذكرت جزء من قانون نيوتن " لكل فعل رد فعل "... اهي تكلمني وانا بمخي اردد لكل فعل رد فعل .. ليش اخلي حياتي ردود لافعال ممكن تصيرلي بحياتي...


ليش مو انا اكون الفعل واخلي ردود افعالي حق افعال انا اقررها ... ليش الافعال اللي تحدد وجهتي النفسيه غالبا ما تكون من بره


انا مو من طبعي اني اقعد وانطر الدنيا تتحرك على شاني ... بس ممكن في خبر او تصرف يقدر يعكر يوم كامل اكون سعيده فيه


وقررت ان دنيتي بتكون بقراري ولونها مثل ما احب واذا شفت شي ما يعجبني رح احول منه شي انا احبه


الون حياتي


ولاني احب الاصفر والاحمر والاخضر .. حياتي بتكون كلها صفره وحمره وخضره واذا صارت لي نقط سوده غصب عني احددها بالواني واطلع منها ورده حلوة تكمل اللوحه اللي رح ارسمها بيومي


طبعا انا كنت افكر بكل هذا ورفيجتي معاي على الخط...


والمذيع بنغم الصباح يسأل " منو يتكلم يستخدم التلفون احسن النساء ولا الرجال؟"


الاجابه اتركها لكم ..


لووول

الأحد، 23 نوفمبر، 2008

احب قطاوتي...


احب قطاوتي...

اعترف بهالشي... مو بس احبهم اموووت فيهم
اهم اقرب احساس لي بالنسبه للامومه...
واعتبرهم عايلتي الصغيره...
مو لانهم ما يصلحون يكونون جزء من عايلتي الكبيره..
بس لاني احبهم ابيهم يكونون ملوتي بروحي >> الانانيه
كانو 7
الام : بيكي

الابو : زعتر افندي ( اسمه مركب هههه... وقصته قصه تضحك واللي يبي يقراها يضغط هني )... وهذا قطي المفضل


5 كيتن : مزيان و لالا و مشمش وكشمش و تن تن ( دلع نيوتن)





بس بذمتكم مو قطاوتي عسل؟... منو يقدر يشوفهم وما يحبهم؟؟

رفيجاتي يضحكون علي... يقولون لي بالعشرينات وعندج هالكثر اذا وصلتي 40 شبتربين؟؟


انا ما يهمني...


ما كان هامني بالاصح لين يي اليوم واضطريت اتخلى عنهم غصب عني...

نفسيتي تازمت جدا جدا جدا بهاليومين لاني فقدت جزء كبير بحياتي.. يعلكم ما تفقدون غالي ابد يا رب

اتمنى من رب العباد انهم يروحون عند ناس يحبونهم ويهتمون فيهم كثري او اكثر مني...
اذا شفتوهم بمزرعه ولا بياخور ولا عند اي احد تعرفونه.. تذكروني ووصو اهلهم اليدد عليهم

الاثنين، 17 نوفمبر، 2008

انا مريزه :<


مادري شفيها مناعتي اختربت...


الفلو لاعبه فيني لعب ...

والله اكسر الخاطر..

الكلينكس تارس الليزي بوي...

و متغطيه بكفر بعد قلبي اختي كانت مسويته لي قبل جم سنه اول ما تعلمت الكروشيه..

احرف د و ف انلغو من قاموسي هاليومين...


الخبر السار


ان ماكو دوام .. فمجابله النت واغوغل


عمركم سويتو سيرج على شي ماله معنى؟ ومن هالشي دشيتو الف موقع واكتشفتو ان صارلكم 3 ساعات على النت وانتو مو حاسين؟


احس ان راسي بينفجر.. خل اروح اخذ دواي


وما اشوف شر...




الجو اليوم رائع...

ولانه رئع قررت اني اكافيء نفسي اني ما اخربط بريوقي...

مو معنى هذا اني ما رحت امس الفورنو وتعشيت هناك هههه ..

ذقت عندهم باستا سبانخ مع صلصه طماط وفلفل ملون ومشروم .. اسمها فيتوشيتي "مادري شنو " برمافيرا

وايد عجبتني ورح احاول اني احاكيها على يوم..

مو هذا الموضوع...

بعد ما وكلت قطاوتي العزيزه ... سويت لي قهوه مركزه من علي كوفي وحطيت لي بقصم ماخذته من سوق الديره بالنخاله غمستها بالقهوه وتوني باكلها ولا اشوف الا مشمش ومزيان وبيكي (( قطاوتي )) مشاركيني بوجبتي...

يالله ما عليه كل مشروك مبروك

بالنهايه حصلت لي على شئفه بقصم والباجي كلوه عليهم بالف وستميه عافيه

يعني يوم قررت وطبقت ... يتني عوائق طبيعيه تمنع هالشي .. يعني ما انلام اذا اكلت تايم اوت قبل الغدا لاني ما تريقت عدل لوووول =>

الأحد، 9 نوفمبر، 2008

اعاني من الوزن الزايد واعترف بهالشي ...
احتاج حميه غذائيه او ما يسمى بالريجيم

بس من اقرر ابتدي نفسي تهف على جميع المسمنات بما فيها اشياء انا اصلا ما احبها ولا تخطر على بالي في الايام العادية

اليوم مثلا ... هددت نفسي من امس اني لازم ( باذن الله ) التزم بالجدول اللي مسويته حق نفسي>>> باذ ذاواي انا حالي حال باجي حكومات الدول العربيه بالتخطيط ايب خطط وانظمها بحيث ما تخرش الميه على قولتهم بس التنفيذ الله بالخير :q

تدرون شصار اليوم....

تريقت بان كيك... عاد والله ماكان يطري على بالي كلشش






الصورة وايد رجيميه هههه والله يستر من الغدا ههههه...

ليييش دايما اول يوم بالريجيم اصعب يوم؟؟؟ وليش دايما ناجله لي اول الاسبوع؟؟.. كان السبت وصار الاحد.. شبيفرق مثلا؟؟

على ما القى هالاجابات بروح اسلي نفسي بكيت كات لندن وفليك :q