الأربعاء، 30 ديسمبر، 2009

كل عام وانت بخير



مرت الايام وعدت الشهور ولقينا روحنا باخر السنه

عدت 2009 بكل الحلو والمر اللي فيها وان شاء الله  اللي ناطرنا ب2010  بيكون احلى

الله يجعل السنه اليديده سنه خير وبركه

وان شاء الله تحققون كل احلامكم وامانيكم فيها وتكون الى الله اقرب

كل عام وانت بخير وهابي نيو يير

السبت، 26 ديسمبر، 2009

السلام على قتيل العبرات...








السلام على الشيب الخضيب ...
 السلام على الخد التريب ...
السلام على البدن السليب ...
السلام على الثغر المقروع بالقضيب ...
 السلام على الرأس المرفوع ... 
 السلام على المرمّل بالدماء ...
السلام على المهتوك الخباء ...
السلام على خامس أصحاب الكساء ...
 السلام على غريب الغرباء ...
السلام على شهيد الشهداء ...
السلام على قتيل الأدعياء ...
السلام على ساكن كربلاء ...
السلام على من بكته ملائكة الارض والسماء ..
السلام على ابن النبي المصطفى...
السلام على ابن علي المرتضى...
السلام على ابن فاطمه الزهراء..

السلام على ابا عبدالله  الحسين الظليمة الظليمة من أمة قتلت ابن بنت نبيها ...

السلام عليك وعلى الارواح التي حلت بفنائك عليكم مني جميعا سلام الله ابدا ما بقيت وبقي الليل والنهار ولا جعله الله اخر العهد مني لزيارتكم السلام على الحسين وعلى علي بن الحسين وعلى اولاد الحسين وعلى اصحاب الحسين



عظم الله  اجورنا واجوركم

الثلاثاء، 22 ديسمبر، 2009

تبكيك عيني لا لأجل مثوبة.. لكنما عيني لأجلك باكية






***عظم الله اجورنا واجوركم***


اخوي سفيد منزل بوستات روووعه عن دروس عاشوراء انصحكم بقرائتها .. تلقونها بهالرابط


الاثنين، 14 ديسمبر، 2009




السلام عليكم
شلونكم وشخباركم
اليوم افكاري نااااشفه

قعدت افكر وافكر
شبكتب
مبطله الشاشه وابحلق فيها
ويمي كوبي العزيز هديه من رفيجتي من ديزني فيه شاي اخضر بالورد الدمشقي والصراحه مو حاسه لا بطعم الورد ولا طعم الشاي
وعلى الحظ اليوم ماكو شغل ولا عمل

وعلى ما قريحتي تشتغل ههههه
اتركم بعنايه الله وحفظه


الخميس، 10 ديسمبر، 2009

مقترحات..بليز؟؟







واخيرا انتهى الاسبوع
مادري ليش دايما اول اسبوع دوام بعد الاجازة يكون طويل واخر يوم افواج الشغل اللي تهل علينا ما تنتهي
زميلي/صديقي اليوم مو مداوم الله يقومه بالسلامه  ومقرر قرقتنا اليوميه اللي تطير علينا الوقت  انلغت (( باي ذا واي اذا تقرا البوست ترا عدلو عليه للمره الثالثه وانا الحين المفروض اعدل على جداولك وجدولي ههههه ))
المفروض اطلع بنت اختي واختي الصغيره بمناسبه  الويكند والجو الحلو
والمفروض الطلعه تكون "اوت دور"
فكرت بحديقه الحيوان وضحكو علي قالو الحيوانات كله نايمه وريحتهم خايسه
قلت لهم خل نروح البحر نلعب وخافو من البرد والقطاوه اللي تحوس 
القهوه الشعبيه خيار بس للحين ما قست نبضهم على السالفه
عطوني مقترحات... وين ممكن نطلع ؟؟



الأربعاء، 9 ديسمبر، 2009

back to Kuwait



*(تحديث وتوضيح ): حبي للكويت مو مجال مداوله ونقاش وانا ما نسيت شصار فيها بالغزو ويعل صدام وزمرته انشلت ايدهم وريولهم قبل لا يدزون دباباتهم القذره بارض الكويت الغاليه من تقريبا 19 سنه
شباب العراق حاليا اطفال الماضي وفي جزء كبير ما كان موجود ومانولد اصلا ومو معقوله اكره شعب كامل بجريره اللي سوه المقبور صداموه واهم مالهم ذنب فيه وبعد اللي شفته ماقدر اشيل بقلبي على ناس ما عندها ابسط ضروريات الحياة كعبايه تستر فيها روحها او كنبل يكفيها برد الشتا وهي نايمه على الرصيف لان مالها مكان تروح له او لقمه حتى لو صمون يابس تسد فيه ريجها لانها ممكن تكون يوم كامل مو ماكله شي... الف الحمدالله على خير الكويت وعلى الخير اللي احنا فيه ... بنفس الوقت ماقدر اطلب من الله الغفران والرحمه وانا ماقدر اغفر ولا ارحم

ومساحه المسامحه والغفران تخصني انا بروحي وتشمل اشياء وايد وما تخص العراقيين بروحهم وانا ما طلبت من احد انه يسامح معاي لاني ادري ان العفو عند المقدره و مو الكل يقدر :>


رحت سفره من احلى سفرات عمري... الاولى مكرر 
بديرة ما كنت مفكره اروح لها
وعيدت بين ناس كانو بآخر حسباتي
بس سبحان الله شلون غيرتني هالرحله من داخل وبرا وخلتني احب الكويت اكثر



رحت العراق

رحت كربلا والنجف وسامرا والكوفه والكاظم
الهدف اني ازورالاماكن المقدسه واكون الى الله اقرب
بس الاهدف الاسمى اني تعلمت شلون اسامح
شلون اغفر
وشلون استمتع بهالشي
ومع ان ذكرياتي بالغزو مره ... حمدت الله الف مره ان سنحت لي الفرصه عشان اروح وقمت ادعي ربي واناجيه انها ما تكون اخر زياره حق هالبقعه الارضيه الزاخره بالكرامات والروحانيه على الرغم من بساطتها (مع ان الكلمه الانسب انها تحت خط الفقر ب 10 درجات ) مع شعب كنت اكرهه كره خيالي

ملاحظه على الهامش: في استقبالي بارض مطار الكويت الحبيبه الكل يي يبارك ويهني وبما فيها فيروسات الكحه والنشله والذي منه وبعد صراع  تغلبت فيه على 80% من الزوار الغير مرحب فيهم اقولكم

الحمدالله اني بالكويت  :>

السبت، 21 نوفمبر، 2009

اروح وارد بالسلامه



استودعكم الله الذي لا تضيع ودائعه
ان شاء الله عقب باجر مسافره
وراجعتلكم بعد 10 ايام

الأحد، 15 نوفمبر، 2009

سرحان



اليوم كنت بدوره خارج الدوام
المفروض انها تتكلم عن شي له علاقه ببناء الذات
بس انقلبت حق نصايح تربويه وغذائيه
وانا عندي مشكله التركيز خاصه لما يكون الموضوع ما يخصني
 فالشق الثاني من الدوره مخي يزن باغنيه بكت فول اوف سن شاين >>يا كرهي لما اكتب بهالطريقه بس مالي خلق اقلب الكي بورد

اعتقد والعلم عند الله لان اكثر مقطع يتكرر  بهالاغينه
"تيك مي اواي"

فحسيت فيها تهقون؟

اني واي حبيت
اشاركم معاي :>
انجوي


الجمعة، 13 نوفمبر، 2009

reading





خلصت واحد...وبقى لي 3 ونص :>
(تحديث): خلصت 3 ونص ... والحين باخر كتاب  :> 

الاثنين، 9 نوفمبر، 2009

:(


حاسه اني ببجي


انسانه اكرها كره العمى
اكره كل حرف من اسمها
مو حقد مني
بس من اللي سوته فيني وباهلي
مادري شقول عنها
انسانه جباره عندها القدره  تحرج اي انسان بسلاطه لسانهاوافعالها القذرة وعشان الواحد يقدر يرد عليها لازم ينزل الى مستوى وايد ضحل اخلاقيا
 حدي منبطه جبدي 

حاولت ابتعد عنها وابعد خواتي من قله ادبها بس ماكو فايده


حتى هديتي من ابوي الله يطولي بعمره اللي المفروض تكون لي بروحي لازم تنفث سمهاو تدخل فيها وتخربها


فرق السن بيني وبينها وصله القرابه تخليني ماقدر اوقفها او اسوي اي شي لها غير اني ادعي الله يبعدها عنا ويكفينا خيرهم وشرهم
صج صج مابي منها تقرب مني ومن خواتي وابوي

بس الظاهر مرح ارتاح الا لما الله ياخذ امانتي او ياخذها

الخميس، 5 نوفمبر، 2009

الجو بديع




الجو اليوم عجييييييييييييييييييييييييب

طلعو واستانسو حسافه الواحد يقعد بالبيت  مع هالجو  الحلو :>

واتمنى لكم اجازة نهايه اسبوع سعيده D:

الجمعة، 30 أكتوبر، 2009

مودي اليوم


الخميس، 29 أكتوبر، 2009

وين المطر؟؟





Last updated: Thursday 29th October at 10:35 AST

Thursday

Light Rain Shower
  • Light Rain Shower
  • Max: 30°C 86°F
  • Wind: SE 22mph 35km/h
  • Hum: 47%
  • Press: 1012mB
  • Vis: Very good
  • Sunrise: 05:59
** ماخذته من موقع BBC 


واتمنى لكم اجازة نهايه اسبوع سعيده 

الأربعاء، 28 أكتوبر، 2009

سويته




الجزء الاول من رجيم  "وداعا للكرش"  من بلوق  د.بومشاري يعطيه العافيه 
 واللي يحب يعرف اكثر يدش هاللينك

العب ولا ما العب في wii-fit?






اخوي الغالي الله لا يحرمني منه شافني مسويه رجيم وعشان يشجعني شرا لي ويي فيت wii-fit




طبعا الكسل خلاني اجربها يوم واحد وبس
ابوي الله يحفظه استغل الفرصه وقام كل يوم الصبح يلعب او ساعات العصاري.. وما شاء الله ارقامه قويه
تصدقون نزل من وزنه وايد وصار تقريبا سمبتيكي


هدومه كلها وسعت وشكله صغر مع ان نظام اكله ما تغير
عاد قلت يا بنيه
اخوج شاريلج هديه
وابوج مثال حي  قبالج يلا شدي الهمه وقومي لعبي لج شويه


ولانه بعد قلبي سمع اني برد العب بالجهاز جان يروح ييب لي لعبه يديده رياضه سامع وايد مدح عنها(( مو جنه وناسه ان عندهم محل :p))
Jillian Michaels Fitness Ultimatum 2010
 وطلعت تمشي مع البورد مال الوي فيت وهذي صورتها



وقالي اذا شديت حيلي وكسرت ارقام ابوي بييب لي wii-fit plus




يعني الحين مالي عذر كلش هههه


رح ابتدي العب 3 مرات بالاسبوع ورح اعطيكم التفاصيل عن العاب وشنو احسنهم واللي استفدت ان شاء الله في البوستات اليايه


يلا منو بيلعب وياي ;>



الأحد، 25 أكتوبر، 2009

HaPpY BiRtHdAy To Me





الأربعاء، 21 أكتوبر، 2009

my diet ...part2






امس موعدي عند بالتغذيه ... قلت لهم يغيرون النظام لاني وقفت صيام وابي اكل عدل هههه.. النظام ينن ومتروس اكل والحلو فيه انه بينزل حلو والله يستر من التخبيص
نظامي للي يحب يعرفه



الريوق: كوب حليب ( حتى لو كامل الدسم ) + 3/4 كوب كورن فليكس


او


كوب عصير+ 1/2 خبزه سمره او 2 توست + حبه جبن او قفشه لبنه او بيضه + طماط وخيار وخس حسب الرغبه






السناك الاول: حبه فاكهه او شاي او عصير  ( طبعا مو منجا ولا موز )






الغدا: سلطه خضرا عليها قفشه وسط زيت زيتون وملح وليمون حسب الرغبه + كوب عيش او نص خبزه او 2 بطاط مسلوق وسط + لحم او سمج بمقدار نص الكف + 3 تمرات + كوب لبن او روب


السناك الثاني: حبه فاكهه


العشا: واحد منهم

1- نفس الريوق
2- نفس الغدا
3-سلطه خضرا+ 4 ملاعق جبن ( نقدر ناخذ السلطه اليونانيه من امريكانا )





هالنظام المفروض ينزل من 3-4 كيلو باسبوعين بشرط الالتزام التام وكالعاده ما ننسى 2 لتر ماي باليوم


هذا نظامي بمستشفى الصباح عند خبير التغذيه  مبارك العازمي وهو صراحه خوووش اخصائي ووايد محترم :>

باذن الله شديت الهمه ...ورح ابلغكم بالنتايج بعد اسبوعين :>


عفيه على شريطي واخير تحرك هههه



 



السبت، 17 أكتوبر، 2009

انا مع ال GMAT





قصتي مع الجيمات قصه

الدوره اخذتها 2006 بجامعه الكويت

الكتب بديت اشتريهم 2008

امتحاني باكتوبر 2009

وبديت ادرس الاسبوع اللي طاف

كل ما اسوي لي جدول دراسه تصير ظروف وتخليني ااجل ليما انحكرت بالوقت

 الله يستر  وما اخبص فيه لان الوقت كلش مو كافي :(

انا مو طماعه بس ابي سكور 600


الخميس، 15 أكتوبر، 2009

شكر خاص





واخيرا هالمدونه المسكينه حاشها التطور ودخلت باللسته بكويت بلوقرز


احب اشكر اخوي Kuwait Bloggers

لاني يننته على ما صلح الخلل اللي كان موجود

شكرا جزيلا ويعطيك الف عافيه



واتمنى لكم جميعا اجازه نهايه اسبوع سعيده

الثلاثاء، 13 أكتوبر، 2009

مابي اشم خلاص



اكره ريحه المستشفيات وهالكره بدا معاي من سبع سنين مع مرض امي الله يرحمها

صار اداء الواجب بعياده المريض مثل الهم.. وابوي الله يطول بعمره اكثر واحد يعرف هالحاله واذا كان الشخص قريب يقدر ويحاول يشرح الموضوع للاهل والقراب



حتى ديتول بيتنا لام يكون بريحه الورد او العطور واشوه شركه داك عندهم خوش منتجات تلبي طلبي





مرت السنين ... والحمدالله على نعمه النسيان خف هالشي تدريجيا من حياتي لين اعتقدت اني تغلبت على هالشي


من 3 شهور شكيت بعارض بسيط ادى الى مراجعات لا تنهي بمرض اكبر ومراجعات اكثر واكثر مطشره باكثر من مستشفى هني وهناك ...المصيبه للحين مو عارفين له بالضبط .. وعلى ما يعرفون يشخصون عدل عشان انا ارتاح لازم تستمر مراجعاتي ولازم اتحمل الريحه الكريهه





اتمنى من كل قلبي يشخصون اللي فيني لاني تعبت من الالم وتعبت من ريحه المستشفيات


بس خلاص مابي اشم

الاثنين، 12 أكتوبر، 2009

test

::::::::::

صابون التونسي للعرائس.. تجربتي معاه







مثل اي بنيه مشوار الجمعيه لازم يتضمن نص الوقت المخصص للتسوق بالتامل بلاين منتجات البشره والصابون 


باحد تلك التاملات شفت هالصابون ..وبما ان الصابون المغربي اللي استخدمه مقطوع فتره قلت ابدل بهالصابون خاصه ان سعره يدل على جودته...سويت سيرج عليه ولقيت انه مشهور في بعض المنتديات وسعره يوصل لي 4 دنانير للعلبه وانا شاريتها بنص السعر


الصراحه... عمري ما وثقت بمدح او ذم ييني من منتدى خاصه اني ياما وثقت بحجي من بنات عن منتج او عشبه او خلطه وطلع شي خربوووووطه


وانا من النوع لما اجرب شي ما احكم عليه الا بعد فتره من الاستخدام عشان لا اظلم بختي


المهم
جربت هالصابون.. في البدايه مثل ما مذكور بالعلبه وطلع عجيييييب عجيييب.. صابون يعطي احساس بالنظافه هالاحساس ما حسيته الا مع هالصابون وصابون مزيونه وشقره


الحين استخدمه عادي من غير بخار ولا انطر 5 دقايق ساعات اقعد اقل وهم مفعوله ينن 







اكثر واحد انصح فيه اللي بالاركان لانه ما ينشف وايد مثل
اللي بالنيله والورد ما عجبوني حسيت الاركان احسن 


طريقه الاستخدام جدا سهله... ببلو الجسم وزعو عليه الصابون ونطرو شوي غسلوه واستخدمو الليفه المغربيه 


طبعا كل وحده لها طقوسها الخاصه بس سمحولي انصحكم بعده استخدمو شاور جل فيه نسبه رطوبه لان هالصابون ينشف شوي  وبالنسبه لي استخدم ستيفز اللي بالمشمش ينن معاه


  واذا تحبون ترطيب زياده خلطو زيت اللوز وبيبي جونسون في المرحله الاخيره واذا ما تحبون ريحتهم رشو من منتجات ليلى من عبد الصمد القرشي سبري الجسم ورد الطائفي و شوي من مسك العروس


وعيشو الانتعاااااااش .. صج صج احساس بالنظافه


حبيت افيدكم وان شاء الله تحبونه وتستفيدون منه كثري :>

الخميس، 8 أكتوبر، 2009

المال والبنون زينة الحياة الدنيا



كنت اعتقد اني موذاك الزود مع اليهال

وباغلب الاحيان مالي طوله بال عليهم

وكنت اظن اني ما عرف لهم وشلون اسكتهم اذا بجو


يتنا السكر المسكر  بنت اخوي اول حفيده.. وتعلقت فيها تعلق جنوني... اول شي لاني احب اسمها وايد والشي الثاني لانها من تشوفني ترفع ايدها عشان اشيلها.. حسيت انها تعرف اني عمتها واني بحبها اكثر من روحي


مرت الشهور ويانا الغنضفر حسون الشكولاته... واي واي على هالصبي شنو عسل اسم الله عليه... من يشوفني يضحك ومن يغط عني جم يوم ازف امه عشان تييبه


وهم مرت الشهور ويتنا الحفيده  الثالثه بنت اخوي ... سبحان الخالق نزلت تشبه ابوها وكتكوووته اسم الله عليها وامها تلبسها لبس يشوووق جنها كيكه متنكره هههه


تصدقون
لقيت روحي تلقائيا اعرف شيبون من بجيتهم .. واعرف متى يكونون يوعانين ومتى البجي مال الدلع واعرف شلون اسكتهم جنه المانيوال مالهم منهم وفيهم هههه



صج اليهال نعمه
مادري شلون ما كنت احس بهالشي من قبل



الله يحفظهم ويحفظ كل ولد وبنت وربي يفرح اهلهم فيهم ولا يحرمهم من بعض  يارب

الأربعاء، 7 أكتوبر، 2009

my new diet






بعد جميع انواع التهبيس والتخبيص بالاكل يي وقت اللي ارد فيه حق قواعدي الرجيميه


وبما اني اصوم هالايام عطوني نظام صيام فيه 1500 سعره .. يعني الزبده شي متروس اكل هههه... نظامي عند اخصائيه التغذيه مريم الكندري وهي صراحه عجيييييبه وانا وايد احبها



وان شاء الله من اليوم ورايح برفع شعار نعم للرجيم نعم للرشاقه








ادعولي :)


نظامي للي يحب يعرفه :


عند الفطور: 3-5 تمرات وعلبه روب او قلاص لبن


بعد الصلاه : فتوش او تبوله وكميه البرغل لا تتجاوز قفشه وكميه الخبز ربع خبزه خفيفه محمصه
كوب عيش او معكرونه او نودلز او ذره او بطاطا كبيره
نص كوب خضار مطبوخه باي شكل عدا القلي وممكن نخليها ستير فراي
وطبعا الايدام نص الكف لحم او سمج او علبه تونا كبيره


بعدها بساعه : حبه فاكهه او نص كوب عصير


والسحور : كوب روب ومعاها 2 توست او 2 هوت هوغ فيها لبنه او جبنه واذا حبيت اغير ابدلهم ب2 حبه فاكهه


الاثنين، 5 أكتوبر، 2009

الصحون المقسمه


شفت ببلوق فرانكوم عدد لا باس به من الاشخاص يسالون  عن هالصحون وحبيت ابلغ لكل من حاب انه يعرف وين ينباع بالضبط
 تلقونه موجود بالضبط بلولو ماركت ولقيت هالاشكال بعد
الطريف في الموضوع ان خواتي حبوه وشريت منهم ههههه


ملاحظه على الهامش...تماشيا مع نصيحه ليزي ديزي  باهميه اكل برتقاله كل يوم للوقايه والحمايه رحت شريت برتقال وصورته وهو بثلاجتنا :>


السبت، 3 أكتوبر، 2009

الله يحفظكم ولا يراويكم مكروه بغالي




دعاء الحفظ

بسم الله الرحمن الرحيم

اللهم صل على محمد وال محمد


دعاء الحفظ

بسم الله خير الاسماء بسم الله رب الارض والسماء بسم الله الذي لايضر مع اسمه سم ولاداء

بسم الله اصبحت وامسيت وعلى الله توكلت بسم

الله على قلبي ونفسي بسم الله ديني وعقلي بسم الله اهلي ومالي بسم الله على مااعطاني ربي

بسم الله الذي لايضر مع اسمه شئ في الارض


ولافي السماء وهو السميع العليم


الله الله ربي لااشرك به شيئا الله اكبر الله اكبر واعز واجل مما اخاف واحذر عز جارك وجل

ثنائك ولا اله غيرك


اللهم اني اعوذ بك من شر نفسي ومن شر كل شيطان مريد ومن كل جبار عنيد ومن شر كل

سلطان شديد ومن شر قضاء السوء ومن شر كل

دابه انت اخذ بناصيتها انك على صراط مستقيم وانت على كل شئ حفيظ شهيد



ان وليي الله الذي انزل الكتاب وهو يتولى الصالحين فان تولوا فقل حسبي الله لا اله الاهو عليه توكلت وهو رب العرش العظيم


الخميس، 1 أكتوبر، 2009

;>



الأربعاء، 2 سبتمبر، 2009

game zone




اخوي وربعه بطلو لهم محل لبيع احهزة والعاب الغيمز ( ويي ونتندو وهالسوالف ) في اسواق القرين...

ومو لاني اخته بس صج اسعارهم حلوه وارخص من الرحاب ... ويقدرون يوفرون لكم الالعاب الغير متوفره بالسوق .. او يطلبون لكم العاب من النت :>

وعندهم ركن للالعاب المستعمله اذا تحبون تبيعونهم او تشترون منهم :>

الله يبارك لهم في رزقهم ويزيدهم من خيره وفضله

وحطيت لكم عنوانهم اللي يحب يشوف .. و ارقامهم للاستفسار :>
ترا رقم المحل 11 بس مادري ليش طالع 1 بالصوره

ملاحظه: خدمه التوصيل مو متوفره حاليا...بس بيحطونها قريب

الثلاثاء، 25 أغسطس، 2009

مو خفت الرطوبه؟


السنترال عندنا بالدوام بارد على غير عاده

يرد علي " كلاص ماكو عرق في هوا برا "


شرد عليه؟؟

اللهم اني صائمه

ملاحظه: هالصوره اخذتها من دريشه غرفتي قبل جم يوم الصبح قبل لااطلع للدوام

الجمعة، 21 أغسطس، 2009

اهلا رمضان


يا حلو هالشهر
دخلته علينا تشرح النفس وتسر الخاطر
بكل بيت تستعد له بطقوسها الخاصه وفرحته يحس فيها الصغير قبل الكبير
وتعود الذكريات وتزيد اللمات وتكثرالطاعات
يا حلوه من شهر
ولهنا عليه وايد
حياك الله يا شهر الخير البركه
واقولكم جميعا
^^^^ مبارك عليكم الشهر ^^^^
وعسى الله ويتقبل صيامنا وقيامنا ويغفر لنا ويتقبل جميع اعمالنا
وكل عام وانتو الى الله اقرب

الاثنين، 17 أغسطس، 2009

انا لله وانا اليه راجعون...

الله يرحمهم ويغفر لهم و يصبر قلوب اهلهم على هالمصيبه





الاثنين، 10 أغسطس، 2009

قصه حلوة من ايميلي...


سأل عالم تلميذه: منذ متى صحبتني؟
فقال التلميذ:
منذ ثلاثة وثلاثين سنة ...
فقال العالم:
فماذا تعلمت مني في هذه الفترة؟ !
قال التلميذ:
ثماني مسائل...
قال العالم :
إنا لله وإنا إليه راجعون ذهب عمري معك ولم تتعلم الا ثماني مسائل؟ !
قال التلميذ:
يا أستاذ لم أتعلم غيرها ولا أحب أن أكذب ...
فقال الأستاذ:
هات ما عندك لأسمع ...
****** ****** ****** ****** ****** ******
قال التلميذ:
الأولى :

أني نظرت إلى الخلق فرأيت كل واحد يحب محبوبا فإذا ذهب إلى القبر فارقه محبوبه
فجعلت الحسنات محبوبي فإذا دخلت القبر دخلت معي .

الثانية:

أني نظرت إلي قول الله تعالي
: ' وأما من خاف مقام ربه ونهى النفس عن الهوى فإن

الجنة هي المأوى' فأجهدت نفسي في دفع الهوى حتى استقرت على طاعة الله .
الثالثة :

أني نظرت إلي هذا الخلق فرأيت أن كل من معه شيء له قيمة حفظه حتى لا يضيع ثم
نظرت إلي قول الله تعالي:
' ما عندكم ينفذ وما عند الله باق ' فكلما وقع في يدي شيء ذو قيمة وجهته لله ليحفظه عنده .
الرابعة:

أني نظرت إلي الخلق فرأيت كل يتباهي بماله أو
حسبه أو نسبه ثم نظرت إلي قول
الله تعالى:
' إن أكرمكم عند الله أتقاكم ' فعملت في التقوى حتى أكون عند الله كريما .
الخامسة:

أني نظرت في الخلق وهم يطعن بعضهم في بعض ويلعن بعضهم بعضا وأصل هذا كله الحسد
ثم نظرت إلى قول الله عز وجل:
' نحن قسمنا بينهم معيشتهم في الحياة الدنيا '
فتركت الحسد واجتنبت الناس وعلمت أن القسمة من عند الله فتركت الحسد عني .

السادسة :
أني نظرت إلي الخلق يعادي بعضهم بعضا ويبغي بعضهم على بعض ويقاتل بعضهم بعضا
ونظرت إلي قول الله تعالي:
' إن الشيطان لكم عدو فاتخذوه عدوا ' فتركت عداوة الخلق وتفرغت لعداوة الشيطان وحده ..
السابعة:

أني نظرت إلى الخلق فرأيت كل واحد منهم يكابد
نفسه ويذلها في طلب الرزق حتى انه قد يدخل فيما لا يحل له .
ونظرت إلي قول الله عز وجل:
' وما من دابة في الأرض إلا على الله رزقها ' فعلمت أني واحد من هذه الدواب فاشتغلت بما لله عليّ و تركت ما لي عنده .
الثامنة :

أني نظرت إلي الخلق فرأيت كل مخلوق منهم متوكل على مخلوق مثله , هذا على ماله
وهذا على ضيعته وهذا على صحته وهذا على مركزه .
ونظرت إلي قول الله تعالي
' ومن يتوكل علي الله فهو حسبه ' فتركت التوكل على الخلق واجتهدت في التوكل على الله .

فقال الأستاذ:
بارك الله فيك

الخميس، 6 أغسطس، 2009

ناصفوه...


غني يا عصافير وزغردي ...ولد إمام الهدى والبشر

أطياب آيات التهاني وبأهل التبريكات نبارك لكم مولد النصف من شعبان

مولد الإمام المهدي الحجة المنتظر عجل الله فرجه الشريف عليه وعلى آله أفضل الصلاة وأتم التسليم

ناصفه شعبان لها طقوس مميزه ببيتنا.. غير الاعمال والتجمع حول التلفزيون عشان نشوف مظاهر الاحتفال

كل سنه بهالوقت نكون صايمين.. نصوم 13 و14 و15 ... ويوم الناصفه خالتي تكون مسويه فطور جماعي بكل مالذ وطاب من الاكلات الشعبيه ( حلوى عيش، مبصل ، هريس ، تشريب ، مجبوس ، مقالي وسمبوسه وكبب .. الخ ).. وفوق كل هذا تعطينا حلاو وسبال محموس خصيصا بهالمناسبه

وهم هالتاريخ يكون مميز لان كل سنه ابوي يميعنا ويحسب لنا الخمس فنكون لاهيين بالجمع والضرب والقسمه .. وبعد ما نخلص كل سنه ابوي يهددنا ان هذي اخر سنه يحسب لنا ومن السنه اليايه لازم نحسب خمسنا بروحنا ههههه... (( حبيبي والله باباتي كل سنه نتعبه ))

وقبل بليله امي الله يرحمها تاخذناتودينا الحسينيات ونروح مسجد الصحاف نعطيهم فيمتو (( مادري ليش ))

هالسنه صار الوضع غير .. بحكم تعب خالتي فماكو فطور جماعي وعشان اختلاف حسبه الوقت مارحنا مسجد الصحاف.. احس ان شي كبير ناقص وتعودنا عليه وربينا عليها.. الله يشافيها ويقومها بالسلامه وان شاء الله نرد مثل اول وهالعاده الحلوه ماتنقطع

ونسألكم الدعاء

الأربعاء، 5 أغسطس، 2009

عيب...


لما تبوح حق صديق او صديقه بموضوع خاص او بمعلومه معينه خااااصه فيك وفيك انت بس ...
وهالصديق ياخذ هالمعلومه ويستغلها ويحورها ويستبنط منها خزعبلات وامراض نفسيه ويركض حق صاحب المعلومه يقوله استنتاجه "الع.. بقري " عن اخر العلل و الامراض النفسيه ويزيد عليهم جم صفه اخلاقيه من اللي قدر ت شطحات مخه تفسرها وعلى وجهه نظره الانتصار جنه مكتشف الذره ويعززها بتصرفات عفويه صدرت منك من 10 سنين... وتطلع الروشته الحل السريع والعجيب لحل لجميع امراض العصر المستعصيه وفوقهم جم كريم لعوار الظهر مع التاكيد على النظره السوداويه للمستقبل اذا ما التزمت حرفيا بالتوصيات لدرجه انك تلوع جبدك وتستغفر ربك الف مره من اللي خلاك تفكر ولو للحظه انك تبوح حق احد بشي مضايقك بيوم من الايام

والله عيب

الأحد، 2 أغسطس، 2009

لن ننسى...









الله لا يعودها من ايام.. اللهم آميين




الجمعة، 31 يوليو، 2009

جمعه مباركه للجميع




جعل الله الجنة داركم والرسول وآله من جيرانكم
والسندس لباسكم ومن الحوض شرابكم
ياقيوم: انت القائم على كل نفس
بماكسبت
اجعلني واحبتي ..ممن
يطيعك ويقوم بحقك وامرك،ولا يغفل عن ذكرك..
" جمعه مباركه"

الأحد، 26 يوليو، 2009

الدوام بعد الاجازة...



كنت جذي..


صرت جذي...
وبالنهايه جذي...