مع انه من النوادر اني اغير فكرتي بكتاب... اذا قلت لء يعني اعدام واذا حبيته ممكن اعيد قرايته 3 مرات.. fس هالفكره تغيرت مؤخرا وتحديدا بهالاسبوعين اللي فاتو
اول ما قريت روايه " the alchemist " ما عجبتني ولا فكرت اكمل العشر صفحات... شريت منها يمكن 3 نسخ وحده عطيتها صديقتي الصدوق والثانيه قطيتها بلبنان من جم سنه واخر مره شريتها من جرير وقطيتها بالبيت .. حزتها شنيت حرب قمت ادافع فيها عن حقي في رفض وقبول اي كتاب او اي فكره اشوفها منطقيه او لء بالنسبه لي... ويمكن من كثر ما دافعت عن حقي في رفضه ما قمت اتقبل ارد اقرا صفحه زياده منه
مع الوضع اليديد ومع وجود الباشا حسين سهران طول الليل ومسهرنا معاه .. عطاني مجال انفض الغبار عن مكتبتي القديمه واقرا صفحات من هالكتاب.. تغيرت فكرتي فيه.. وحسيت اني ادين حق المؤلف باعتذار هههههه
العكس صحيح بالنسبه حق الروايه الثانيه المقطوطه يمها ههه ¨my sister ´s keeper¨ ... كنت وايد متشوقه اني اقراها خاصه بعد ما سمعت عن الفيلم والمؤلفه.. وتقريبا دخت السبع دوخات على ما حصلتها لان ابوي الغالي مسوي حظر على طلبات كتب امازون خاصه بعد الكتاب الاخير اللي دفعت 3 اضعاف سعره على الشحن والتوصيل ههه
القصه حلوه وممكن تشد اي احد غيري .. بس انا ما قدرت اكمل بعد صفحه 42
حسيتها دخلتني بدهاليز رماديه مابي اذكرها... وصحت فيني مشاعر كنت خاشتها باعمق ركن باقصى زاويه من عقلي الباطن .. مشاعر حتى بحزتها ماكنت ابي احسها.. فتسكر الكتاب
مادري اذا ممكن اغير فكرتي فيه بعدين ويحل محل " الخيميائي " -بالعربي- بيدي :>
بالنهايه كل شي بالدنيا يستحق فرصه ثانيه... واللي ما تقبله اليوم باجر بتتغنى فيه او مثل ما ذكرت قصيده خالد الفيصل اللي تغنى فيها عباس ابراهيم مقطع... من يرفض العشر بيقبل عقبها سبع
نصيحتي لكم ...ضايقكم شي بعدوه ولا تجبرون نفسكم تمشون فيه لان العرف والبيئه اللي دار مدارنا ماشيه فيه... بس في المقابل عطو اي شي انتو ماخذين عنه فكره قديمه فرصه يديده يمكن تحبونه ويطلع من جل اشياءكم المفضله :>
ودمتم سالمين
