say my name ...say my name

اختي حبيبتي بالبيبي عانت من البدايه

غير الحمال والثقل نسات قشره وتطول  ... لازم محد على محيط كيلو متر منها ما يكون حاط لا عطر ولا بخور ولا اي نوع من انواع العطور ولازم يستبح كل يوم 3 مرات لان لا سمح الله يمكن قعد تحت الشمس بديره شمسها تدش وين ماكان وريحه الشمس على قولتها خايسه (( في احد شم ريحه الشمس من قبل ؟؟؟))

ولدت وايد مبجر  تقريبا قبل 4 اسابيع من موعدها  لان البيبي كانت تعبانه ما فيها نبض والحبل السري ملتف عليها والقولون كان عندها منتفخ...مسكينه كانت رايحه موعد عادي ولا يقولون لها لازم ولاده

بحزه الولاده الدكتوره كانت لاهيه تولد مريضه ثانيه  وابره الظهر ماكانت تشتغل عندها فشالت المستشفى كله على صراخها

ولدت ياهل كبر البندقه كيلوين ونص اول ما طلعت للدنيا وطبعا الحين فشت اكثر ... وحنتها لا اله الا الله ما تمشي مع حجمها

كل هذا ولا شي مقارنه باللي تعانيه الحين

شنو يسمونها ؟؟؟؟؟

الابو يبي اسم   والام تبي اسم  واليده اسم  واليد اسم  والعم يبي اسم  واغلب اللي يزورون ما يقصرون بالاقتراحات ...بين ايات وشهد وفاطمه  والعنود قمت اناديها  توته لانها  جنه توت لبنان اللي بنبع الصفا والباروك

تهقون يسمونها توت؟؟؟

ليش عمليه التسميه وايد صعبه ؟؟.. يوم بينت بالسونار بنيه الكل كان ساكت والحين  كل من يفتي باسم مادري  من وين

انا نصحتها قلت لها ما عليج من ولا احد... كل من  سما عياله على هواه ... شوفي انتي وابوها شتبون سموها

ومن هني لين يسمونها  انا مصره على موقفي واسم الدلع مالها بيكون توت

ملاحظه داشه عرض ... وااااي الحلبه بالصيف مو شي لا علج لبان لا شبه وحرمل تشيل الريحه من البيت.... لييييييييييش لازم حلبه بالنفاس صيف شتا .. ليش ما يحطون مثلا بهار ما فيه ريحه او اشياء بارده تمشي مع هالجو

ابي ابجي من ريحه الحلبه   اهيء اهيء 



Sent from my BlackBerry® smartphone from Wataniya Telecom