ممممم ريحه هالمحل بروحها كافيه انها تنقلني الى عالم ثاني ... لو بختصرها بقول ان ريحه نظافه ... ماكو بنت ما تحب منتجات البيوتي ... سبب حبي له بزود ان المنتجات صنع يدوي من اشياء فرش وما فيها مواد حافظه بنسبه كبيره وعشان جذي بتحسون بفرق باستخدامها ... اللي يعيب هالمحل وجهه نظري اسعاره ساعات تكون دبل او اكثر من سعر المنتج من المصدر الاصلي ( بريطانيا ) بالاضافه الى ان ما عندهم سامبل يعطونكم اياه عشان تجربون البضاعه واذا عجبتكم تشترون منه خاصه ان الاسعار مو رخيصه ( هالشي موجود بمحلات بريطانيا وامريكا ودبي واعتقد السعوديه ) .. الشي الثاني اللي يبيعون ما عندهم خبره كافيه بالمنتجات يعني اللي ابي اشتريه اسوي له سيرج بالانترنت بموقعهم الاصلي او اقرا الريفيو وبناء عليه اعرف كل منتج حق شنو بالضبط لاني جم مره ينباع لي شي واكتشف بعدين ان الطريقه اللي علموني عليها غلط او المنتج مو بالمواصفات اللي انقالت ( مع انهم حبوبين ويرحبون بالزباين )
تجربتي اللي بذكرها تخصني ومو دعايه لاحد ... بذكر كل منتج جربته وحق شنو ؟ وشلون الاستفادة منه ؟وهالنتيجه اللي بذكرها شفتها مع الاستخدام المستمر
اللي على اليمين بلسم شعر يعالج الشعر المتقصف ويعيد حيويته من مكوناته زيت الافوكادو وحليب الصويا و طحالب وزيت زيتون
احبه حبا جما احب ريحته واحب ملمس شعري بعد ما غسله ... اول شي لاحظته وانتبه عليه اللي حولي لمعان شعري والشي اللي احبه ان ريحته تظل بشعري تقريبا يومين ريحته شي لطيف بس مو مميز اذا شميتوه بتحسون بقصدي
سعره بالكويت 7.5
المليح اللي يمه شامبو الشعر الجاف يرطبه ويحافظ على تموجاته من غير ما يكون ثقيل من مكوناته جوز الهند والبابايا وزبده الكوكا وبيض وقطع جوز الهند فيه ظاهره
قوامه ثقيل اثقل من الشامبو العادي وحتى رغوته مو كبيره بس تفي بالغرض احسن طريقه لاستخدامه عشان لا تاذيكم قطع الجوزهند وعشان يسهل توزيعه على الشعر كله كالاتي : اخدو كميه بسيطه من الشامبو وضيفو لها ماي وغوها بيدكم وبعدين ضيفوها بفروه الراس والشعر ... هالشامبو عجييييب احبه جدا جدا وان شاء الله رح يكون عنصر دائم بخزانتي بس ما انصح فيه كاستخدام يومي لان نسبه ترطيبه عاليه وما يحتاج بلسم وراه الا اذا الشعر ناشف جدا
سعره بالكويت 8
صابون كارما : صابون عادي لكل انواع البشره من مكوناته البرتقال وزيت جوز الهند وزيت الصنوبر وزيت اللافندر
بالرغم من كميه الزيون اللي فيه الا انه ينشف بشرتي وما قمت استخدمه الا كصابون لغسيل اليد اللي يشدني له ريحته لانها منعشه جدا وتنشطني اول ما اقعد من النوم وممكن ادش الحمام بس عشان اشمها ...ريحتها يايه على برتقال وبهارات مو عارفه اشرحها بالضبط بس اللي اعرفه انكم يا تحبونها يا تكرهونها لان اختي الصغيره ما تواطن ريحتها
سعرها : 3.150 / 100 غرام
YOU SNAP THE WHIP صنفره : لازاله الجلد الميت خفيفه نوعا ما على الجسم وتتركه انعم والطف من مكوناته فحم و زبده كوكا وزيت المكادميا وريحته يايه على توت اسود
حلوة وتقشيرها لطيف على البشره بس ريحتها ما تظل على البشره وعيبها انها تذوب ذوبان سريع بالماي يعني حدكم 3 استخدمات او 4 بالكثير واذا حطيتوها تحت الشمس تذوب وما تحافظ على شكلها ... شريتها مره وما عدتها ونصيحتي لكم اذا بتاخذونها قطعوها قطع صغيره واستخدمو اللي تحتاجونه والباجي خلوه بالثلاجة
سعرها :4.750
حلوة وتقشيرها لطيف على البشره بس ريحتها ما تظل على البشره وعيبها انها تذوب ذوبان سريع بالماي يعني حدكم 3 استخدمات او 4 بالكثير واذا حطيتوها تحت الشمس تذوب وما تحافظ على شكلها ... شريتها مره وما عدتها ونصيحتي لكم اذا بتاخذونها قطعوها قطع صغيره واستخدمو اللي تحتاجونه والباجي خلوه بالثلاجة
سعرها :4.750
ANGELS ON BARESKIN
ماسك : صنفره خفيفه للوجه من مكوناتها اللافندر واللوز المطحون وزيت البابونج وريحتها الطاغيه لافندر
مريحه للبشره طريقه استخدامها انكم تزيدونها ماي ليما تصير مثل المعجون وتحطونها على الويه وبعدين تغسلونها انا اذوبها بماي ورد لزياده الانتعاش بس استخدمها كماسك لاني ما اعتمد عليها كصنفره للتنظيف ومفعولها خفيف جدا
سعرها : 4.750
SOFT COEUR للمساج : من اسمها انها زيت مساج والمفروض انها للمتزوجين او الكوبل لانها نزلت بالفلانتاين من مكوناته زبده الكوكا وزبده الشيا وعسل وبالنص اكو بودر ككاو ريحتها توفي
قالولي انها ترطب الجسم بس ترطيبها عادي مو ملحوظ وعشان تذوب الجسم يفضل يكون حار ... استعمالها مرتين او ثلاث بالكثير وبعدين الككاو اللي بالنص يتبطل ويصير الوضع فوضى مزعج ... شريتها مره وما عدتها لاني ما حبيتها
سعرها : 3.750
نوعين شاور جل
اليمين من مكوناته زيت الزيتون ورق العنب وزيوت الحمضيات مثل البرتقال ريحته تشبه وايد الوايت مسك من بدي شوب + افتر شيف رجالي
لان الشاور جل قواه خفيف فالزيت يطفو من فوق فلازم ترجونه عدل قبل الاستخدام ( رح يتحول لونه اللى وردي ) مشكلتي معاه ريحته ما اطيقها احسها رجاليه وترطيبه عادي فخليته كصابون يد سائل ... ممم ماعتقد اني رح اشتريه مره ثانيه لاني جربت اللي احسن منه
سعره : 7.5 /250 غ
اليسار من مكوناته العسل وزيت البرتقال الحلو وزهره اللوتس ريحته توفي
ترطيبه حلو وريحته حلوة ويعجبني مفعوله اذا خلطته مع رب رب رب .. المره اليايه رح اشتري الحجم الكبير لان مو حسافه عليه
سعره: 8 /250 غ
صنفره من مكوناتها الملح البحري و عصير الليمون وزهره الياسمين وريحته تشبه البحر
احبها جدا بالرغم من حبيبات الملح اللي فيها الا انها ناعمه جدا على البشره اذا انخلطت بالماي واذا تبون تاثير قوي حطوها على الجلد الناشف قبل الشور ... افضل اخلطها مع شورجل it's raining men لنعومه ملحوظه .. مكتوب انه يصلح للشعر والجسم بس ما جربته بشعري للحين
سعره : 8
هالمنتجين اخذتهم بناء على نصيحه البائعه هناك
باليمين تركش ديلايت ما حبيته ريحته ماي ورد على حلاو بس ينشف جسمي وما حسيت لا بفرق بالترطيب ولا لمعه بجسمي مثل ماهو مذكور سعره غالي والعلبه حتى مو متروسه
سعره 15 دينار
رو ارغان استخدامه مثل بلسم للجسم يستخدم باخر الشور تفردونه على الجسم وبعدين تغسلونه بماي و يترك الجسم كريمي من مكوناته الارجان وزيت اللوز وريحته صايره على ورود
حلو استخدامه ولانه يترك الجسم كريمي فترطيبه يكون حلو حبيته حق الشاور الليلي
سعره 11 دينار
اليسار من مكوناته العسل وزيت البرتقال الحلو وزهره اللوتس ريحته توفي
ترطيبه حلو وريحته حلوة ويعجبني مفعوله اذا خلطته مع رب رب رب .. المره اليايه رح اشتري الحجم الكبير لان مو حسافه عليه
سعره: 8 /250 غ
صنفره من مكوناتها الملح البحري و عصير الليمون وزهره الياسمين وريحته تشبه البحر
احبها جدا بالرغم من حبيبات الملح اللي فيها الا انها ناعمه جدا على البشره اذا انخلطت بالماي واذا تبون تاثير قوي حطوها على الجلد الناشف قبل الشور ... افضل اخلطها مع شورجل it's raining men لنعومه ملحوظه .. مكتوب انه يصلح للشعر والجسم بس ما جربته بشعري للحين
سعره : 8
هالمنتجين اخذتهم بناء على نصيحه البائعه هناك
باليمين تركش ديلايت ما حبيته ريحته ماي ورد على حلاو بس ينشف جسمي وما حسيت لا بفرق بالترطيب ولا لمعه بجسمي مثل ماهو مذكور سعره غالي والعلبه حتى مو متروسه
سعره 15 دينار
رو ارغان استخدامه مثل بلسم للجسم يستخدم باخر الشور تفردونه على الجسم وبعدين تغسلونه بماي و يترك الجسم كريمي من مكوناته الارجان وزيت اللوز وريحته صايره على ورود
حلو استخدامه ولانه يترك الجسم كريمي فترطيبه يكون حلو حبيته حق الشاور الليلي
سعره 11 دينار
